Festival de Ortigueira

Exposición "Carácter Celta"
Un ano máis, un fotoxornalista presenta a súa mirada sobre a cita folk. Nesta ocasión, o elixido é Ángel Manso, profesional ligado a La Voz de Galicia. A través das súas instantáneas sobre o ambiente, as xentes e os concertos poderase revivir o que foi a edición 2009 do Festival Ortigueira. A colección abriráse ao público días antes do Festival, no claustro da Casa Consistorial.

Exposición "Olladas no Camiño de Santiago"
A Casa Consistorial (1ª planta) acolle esta exposición itinerante do Xacobeo 2010 que mostra, dende a óptica dos fotógrafos Delmi Álvarez, Fernando Bellas, Tino Martínez, Javier Teniente, Xulio Villarino e Tino Viz, a riqueza que o fenómeno xacobeo xenera en Galicia. A paisaxe, o patrimonio arquitectónico, os peregrinos visitantes e persoas que viven ao longo dos Camiños que levan a Santiago son rexistrados polas cámaras destes seis autores.

Universo Crebinsky: película e banda
O Festival Ortigueira acolle a estrea dunha das películas galegas máis agardadas do ano: Os Crebinsky. Rodada en terras do Ortegal, esta comedia de aventuras de produción 100% galega, está dirixida por Enrique Otero e constitúe unha auténtica road movie.

O filme mostra aos irmáns Crebinsky (Miguel de Lira e Sergio Zearreta) no seu peregrinar á procura da súa vaca Muchka. Será unha viaxe interior de encontros inesperados, sentimentos ocultos e lembranzas borradas. Sen saber onde van, rematan descubrindo de onde veñen. Completan o reparto da película, entre outros, Luis Tosar e Celso Bugallo.

Pero o Universo Crebinsky inclúe ademais o animado espectáculo da
Banda Crebinsky, formación musical capitaneada pola estrela do leste, Vazdín Yukhknevich (voz e acordeón), que acompañará o xoves e o venres ao filme na súa estrea en Ortigueira.

Feira de artesanía
O Festival reserva espazo no paseo marítimo para a venda de produtos artesanais. Casetas e postos ambulantes ofrecerán aos visitantes diversidade de pezas únicas, produtos de reventa e artesanía do mundo. A organización primará a promoción de sectores en risco de desaparición e as propostas máis novas. Estará activa dende o mediodía e ata depois de acabados os concertos.

Curso gratuíto de zanfona, impartido polo mestre zanfonista, Óscar Fernández (12 prazas, á metade dos participantes prestaráselles a zanfona, grazas ao apoio do Concello de Narón).

Curso gratuíto de construcción de palletas, co mestre palleteiro Javier Pena Louzao (Bossa) (10 prazas)- Xoves, de 16 a 18 h; venres, de 11 a 13:30 h e de 16 a 18 h ; sábado, de 11 a 13:30 h.

Curso gratuíto de regueifa, da man de Luis "O Caruncho" e Benito Bieito (40 prazas)- Xoves, venres e sábado, de 11:00 a 13:30 h.

Curso gratuíto de baile galego con Xavier Espasandín, profesor de baile da Asociación Gamelas e Anduriñas (20 prazas de iniciación, 15 de perfeccionamento) - Iniciación: venres e sábado de 11:30 a 13:30 h. Perfeccionamento: venres e sábado de 16:30 a 18:30 h.

Curso gratuíto de bouzuki, impartido por Fernando Barroso (10 prazas)- Xoves, venres e sábado de 10:30 a 13 h. Requírese dominio suficiente do instrumento.

Curso gratuíto de guitarra folk celta, impartido por Fernando Barroso (10 prazas)- Xoves, venres e sábado de 16:30 a 19 h.

Radio en directo
Radio Galega Música emite, dende o Teatro de Beneficencia, sendos monográficos do programa Lume na Palleira sobre o Festival Ortigueira. Presentado por Emilio Españadero, realizaranse o sábado a partir das 16:00 horas e o domingo dende as 14:00 horas.